ფერწერა

„მაინტერესებს და ვსწავლობ იმას, რაც იბადება დაპირისპირებულთა უშუალო შეხებისას, ურთიერთშეღწევისა და ურთიერთგამსჭვალვისას. მხიბლავს ნანგრევი და ბზარი, როგორც ანაბეჭდი, იეროგლიფი და ნიშანი ბუნებისა და კულტურის, გაკეთებულისა და შობილის ურთიერთგანაყოფიერებისა. მიზიდავს ის, რაც ბუნებაში ხელთქმნილს (კულტურას) შეუტანია და ის, რაც ხელთუქმნელს (ბუნებას) წაუშლია, ან ვიტალური დამღა დაუდია.

 

ვიკვლევ და ვსწავლობ წარმავალ ფორმებში წარუვალის გაცხადების ნიშნებს, როგორც ამოუცნობ, ამოუხსნელ იეროგლიფებს, ვანიჭებ რა მათ მეტაფორულ და სიმბოლურ მნიშვნელობებს. ამიტომ მიყვარს ხელოვნებაში ზღვარზე ყოფნა; მიყვარს ზღვრის განცდა, მით უმეტეს მაშინ, როდესაც შემიძლია დავიცვა წონასწორობა.

 

წონასწორობა ზღვარზე – ეს არის ჩემი არტისტული აქტივობის ძირითადი ორიენტირი, რომლის დროსაც სამეტყველო ენა და ფორმები სრულიად შეუზღუდავია. ამიტომ არ არსებობს რაიმე ფორმისმიერი აკრძალვა, არ არსებობს სხვა ცენზორი არც ჩემში და არც ჩემს გარეთ გარდა გულწრფელობისა, რომელსაც ზურგს დიდი პროფესიული გამოცდილება უმაგრებს."