საქართველო. XX საუკუნე (ტომი II)

საქართველო. XX საუკუნე (ტომი II)

ავტორთა კოლექტივი

ორტომეული მიზნად ისახავს, წარმოადგინოს XX საუკუნის საქართველოს ობიექტური ისტორია ახალი მეთოდოლოგიის,  მდიდარი წყაროთმცოდნეობითი ბაზისა და ისტორიოგრაფიული მემკვიდრეობის  კრიტიკული გააზრების საფუძველზე. ქართველი ისტორიკოსების მიერ ახლებურად მომზადდა კომპლექსური, მრავალპროფილური გამოკვლევა, რომელშიც შესწავლილი  და მაქსიმალური  ობიექტურობით წარმოჩენილია ქართველი ერის ისტორიული განვითარება ერთ-ერთი ყველაზე დრამატულ პერიოდში – მსოფლიო ომების, რევოლუციებისა და სახელმწიფო გადატრიალებების, საზოგადოების ეკონომიკური და პოლიტიკური  ფუნდამენტების რევოლუციური თუ ევოლუციური გარდაქმნების ეპოქებში.

XX საუკუნე იმითაც არის აღსანიშნავი, რომ საქართველომ თავისი ისტორიული გზა დაიწყო როგორც დაპყრობილმა, რუსეთის მარწუხებში მოქცეულმა, გუბერნიებში გადანაწილებულმა ქვეყანამ და დაასრულა თავისუფალმა, მსოფლიო თანამეგობრობის მიერ საყოველთაოდ აღიარებულმა,   დამოუკიდებელმა  და სუვერენულმა სახელმწიფომ. ამ დიდი მიზნისაკენ ქართველი ხალხისა და საქართველოში მცხოვრები სხვა ეთნიკური ჯგუფების ერთობლივი ძალისხმევა  რელიეფურად აისახა მათ საერთო საქმიანობაში, სოციალურ-ეკონომიკური ურთიერთობების განვითარება-განმტკიცებასა და კულტურულ აღორძინებაში.

ორტომეულში ნაჩვენებია საქართველოს სამოციქულო ეკლესიის ბრძოლა ქართველი ერის სულიერი გადარჩენისა და ტრადიციული ფასეულობების დაცვა-განვითარებისათვის. ასევე, წარმოჩენილია კავკასიელი ერების მეგობრული ურთიერთობების საგულისხმო ეპიზოდები.

XX საუკუნეშიც, როგორც ისტორიული განვითარების ყველა ეტაპზე, ერთი წუთითაც არ შენელებულა ქართველი ერის ტრადიციული ლტოლვა და უდიდესი ძალისხმევა ეროვნული კულტურის, მეცნიერების, ხელოვნების, მხატვრული ლიტერატურის შემდგომი განვითარების საქმეში.

გაზიარება