8-12 აპრილს თბილისის სახელმწიფო უნივერსიტეტში ზვიად გამსახურდიასადმი მიძღვნილი კვირეული გაიმართება. კვირეულის ორგანიზატორები არიან: თბილისის სახელმწიფო უნივერსიტეტი, უახლესი ისტორიის ცენტრი და გამომცემლობა „არტანუჯი“.
კვირეულს გამოფენა გახსნის. 8 აპრილს, 15:00 საათიდან თსუ-ს მუზეუმში (I კორპ, II სართ.) დამთვალიერებელი იხილავს ზვიად გამსახურდიას ცხოვრებისა და მოღვაწეობის ამსახველ ფოტოებს, საარქივო მასალებს, ზვიად გამსახურდიას ხელნაწერებს, წიგნებს, თარგმანებს, სამეცნიერო სტატიებს და სხვ. საგამოფენო მასალები, რომელთა დიდ ნაწილს საზოგადოება პირველად იხილავს, დაცულია შსს-ს და კერძო პირების არქივებში, და ისინი ძირითადად ორიგინალის სახით იქნება წარმოდგენილი. მათ შორის განსაკუთრებით აღსანიშნავია: 1956 წელს „გორგასლიანის“ საქმის მასალები, 1977 წელს ზვიად გამსახურდიას მიერ იზოლატორში დაწერილი წერილები (ხელნაწერები), ზვიად გამსახურდიას წერილები ვიქტორ ნოზაძეს (ხელნაწერები), 1970-იან წლებში გამოცემული არალეგალური დისიდენტური გამოცემები („ოქროს საწმისი“, „საქართველოს მოამბე“).
იხილეთ სამეცნიერო კონფერენციის პროგრამა.
